Космонавтика күнүгэр быыстапка

Аан дойдутааҕы космонавтика күнүгэр аналлаах космос тиэмэтигэр киэҥ быыстапка Г.В.Егоров аатынан Мүрү 1 №-дээх орто оскуолатын музейыгар муус устар 11-13 күннэригэр туран үөрэнээччилэр, учууталлар сэҥээриилэрин, биһирэбиллэрин ылла. Быыстапка хаһаайына – бэйэтин айар үлэтинэн улууспут дьонугар-сэргэтигэр үчүгэйдик биллэр киһи, «Умсулҕан» улуустааҕы коллекционардар түмсүүлэрин актыыбынай чилиэнэ Луковцев Станислав Николаевич. Станислав Николаевич 40 сыл устата дьаныһан туран космос уонна авиация тиэмэтигэр муспут баай коллекцията бэйэтэ туспа музей буолар кыахтаах. Ол курдук, космоска аналлаах араас эгэлгэ открыткалары, кинигэлэри, мааркалары манна көрүөххэ сөп. Аҥардас значоктарын ахсаана элбэҕэ киһини сөхтөрөр. Бу курдук сыралаһан, үгүс бириэмэтин анаан муспут коллекциятын кытта билсибит дьон бары сөҕөллөр. Ол иһигэр космонавтар бэрт истиҥ тыллардаах баҕа санааларын суруйуулара баар. Быыстапкаҕа Дүпсүннээҕи авиация уонна космонавтика музейыттан (сал.Протопопова О.Ф.) сэдэх экспонаттар кэлэн турдулар. Оҕолор ордук луноход кыра моделын сөҕө көрдүлэр. Маны тэҥэ быыстапканы Нам улууһун үөрэҕин управлениетын үлэһиттэрин делегацията уонна иитэр үлэҕэ улуустааҕы семинар кыттыылаахтара көрдүлэр, олох фантастика диэн сыанабыл быһан тарҕастылар.

Е.Н.Сыроватская, оскуола музейын сотруднига

13.04.2017 с.