“Кыым” уонна “Бэлэм буол!” хаһыаттар тэрээһиннэринэн оскуола хаһыаттарын көрүү ыытыллан түмүктэннэ. Өрөспүүбүлүкэтээҕи күрэх балаһыанньатынан оскуола хаһыатын биэс ньүөмэрин ыыппыппыт. Онно биһиги оскуолабыт “Сыдьаай” хаһыата кыттан “Айар тыыннаах хаһыат” анал ааты ылары ситистэ.

   Түмүгү истэргэ ыҥырыы ыламмыт “Чаҕыл” эдкорпост 9 чилиэнэ салайааччыларбытын кытта бара сырыттыбыт. “Кыым” хаһыакка бэриниилээхтик үлэлээбит журналист Федора Петровна Егорова аатын үйэтитиигэ ананан ыытыллыбыт күрэххэ Бүлүүттэн, Кэбээйиттэн, Намтан, Амматтан, Чурапчыттан, Мэҥэ - Хаҥаластан, Дьокуускай куорат 17 №-дээх оскуолатыттан кыттыбыттар.

   Тэрээһини “Бэлэм буол!” хаһыат редактора Кузьмина А.А. иилээн-саҕалаан ыытта. Ф.П.Егорова аймаҕа Лидия Терехова Федора Петровна 1967 сыллаахха саха дьахталларыттан бастакынан МГУ-ну бүтэрэн кэлбитин уонна үйэтин тухары “Кыымҥа” эрэ үлэлээбитин кэпсээтэ, ону истэн сөхтүбүт.             Аймахтар анал бириистэрин Бүлүүттэн “Кэскил” оҕо түмсүүтүн, Амма Сулҕаччытын оскуолатын хаһыаттара ыллылар. Нам Хомустааҕын оҕолоро бастакы, Мэҥэ-Хаҥалас Чыамайыкы оскуолата иккис, Чурапчы Мындаҕаайы оскуолата үһүс миэстэлэри ыллылар. Маны таһынан “Бастыҥ ыстатыйа”, “Бастыҥ кылаас хаһыата”, “Кыайыыга дьулуур”, “Бастыҥ дизайннаах хаһыат”, “Бастыҥ редакция” анал ааттар ананнылар. Мин санаабар, биһиги хаһыаппыт “айар тыыннаах” диэн ааты ылбыта суолтата үрдүк. Ол курдук хаһыаппытыгар бэйэбит айбыт хоһооннорбут, Амма Аччыгыйын туһунан санаабытын өйтөн суруйуу курдук суруйбуппут, айымньыларынан уруһуйдарбыт, викториналарбыт, “Түөлбэ” куруһуок оҕолоро Улуу Кыайыы 70 сылыгар араас хайысханан үлэ ыыппыттарын суруйбуттара  бу үрдүк ааты ыларбытыгар төрүөт буоллахтара.

     Күрэххэ кыттыбыт хаһыаттары ырытыы буолла. Кэлбит ыалдьыттар бары хаһыаттарын, үлэлэрин билиһиннэрдилэр. Биһиги ырыаһыт кыргыттарбыт Сивцева Юля, Константинова Сардаана ырыа ыллаатылар, Сивцева Милена бэйэтэ суруйбут хоһоонун аахта. Түмүккэ бары хаартыскаҕа түстүбүт.

    Биһиги бу көрсүһүүттэн элбэҕи билэн-көрөн кэллибит. «Бэлэм буол!” хаһыат редакциятыгар, чуолаан Ангелина Афанасьевнаҕа дириҥ махталбытын тиэрдэбит.

“Чаҕыл” эдкорпост чилиэнэ Васильева Юля,

Мүрү 1 №–дээх орто оскуолата , Уус-Алдан.