Кулун тутар 28 кµнµгэр Мүрү 1 №-дээх орто оскуолатыгар гражданскай сэрии геройа, культармеец Г.В.Егоровка аналлаах күн герой төрөөбүт күнүгэр сөп түбэһиннэрэн ыытылынна. Төһө да оҕолор күүтүүлээх сааскы сынньалаҥнарыгар сырытталлар, оскуола аактабай саалатын толору оҕо муһунна. Быйылгы герой төрөөбүт күнүн «Өйдүүбүт, сүгүрүйэбит, махтанабыт» диэн тылларынан бэлиэтээһиммит биир бэлиэ төрүөтүнэн герой аата Мүрү орто оскуолатыгар иҥэриллибитэ аны сайын бэс ыйын 26 күнүгэр 70 сыла туолар. 70 сыл устата герой аатын оскуола чиэстээхтик сүгэн кэллэ. Г.В. Егоров быһаччы көмөтүнэн, туруорсуутунан оскуолабыт урукку икки этээстээх мас дьиэтэ тутуллан, үлэҕэ киирэн, хас эмит уонунан сыллар устата сүүһүнэн оҕону олох киэҥ суолугар үктэннэрдэҕэ. Геройга аналлаах күҥҥэ Дьокуускай куораттан ХИФУ историческай факультетын аан дойдутааҕы история уонна этнология кафедратын аспираннара К.М. Макарова, И.И. Собакина уонна историческай факультет 4 курсун студена А.Н. Петров, ону тэҥэ улууспут музейдарын, библиотекатын үлэһиттэрэ кэлэн оҕолор ааҕыыларыгар экспердарынан үлэлээтилэр. Ыҥырыылаах күндү ыалдьыт быһыытынан герой хос сиэнэ, эдэр киһиэхэ бэрт үчүгэй тыллаах-өстөөх үүнэн иһэр ыччат Г.Е. Васильев сырытта, оскуоланы кытта билсэн инникитин сибээһи тутуһуох буолан барда. Күн үөрүүлээх аһыллыытыгар оскуолабыт директора С.С.Бурнашев, герой дойдутун Байаҕантай нэһилиэгин баһылыгын солбуйааччы С.К. Федоров, герой хос сиэнэ Г.Е.Васильев, үөрэх управлениетыттан П.П. Баханов эҕэрдэ тылы эттилэр. Салгыы Танда музейын үлэһитэ Е.К. Колодезникова уонна оҕо библиотекатын сэбиэдиссэйэ В.А.Портнягина геройга аналлаах көрдөрүүгэ туруорбут экспонаттарын, кинигэлэри, хаһыат матырыйаалларын билиһиннэрдилэр. Ол кэннэ таһырдьа тахсан тэрээһин кыттыылаахтарын ортотугар Г.В. Егоровка аналлаах памятникка тыыннаах сибэкки дьөрбөтүн герой хос сиэнэ уурда. Салгыы үс секциянан ааҕыылары истии буолла. Лауреаттарынан бастакы секцияҕа Мүрү 1№-дээх орто оскуолатыттан Пермякова Валерия (8 «б» кыл.), иккискэ - Павлова Сахаайа уонна Ховрова Фрося (8 «а» кыл.), үһүскэ – Васильева Кристина (10 кыл.) ааттаннылар. Маны тэҥэ хас секция аайы үстүү миэстэ уонна биһирэбил бэлиэ хаһаайыннара быһаарылыннылар. Ааҕыыларга Танда орто оскуолатыттан О.В. Румянцева, С.Н. Аммосова, Окоемовка сүрүн оскуолатыттан Пестряков Г.Д. бэлэмнээбит оҕолоро Матвеев Радик, Андросов Андрей, Аммосова Аня (Танда орто оск.), Ушницкая Иванна (Окоемовка сµрµн оск.) бириистээх миэстэлэргэ тигистилэр. Хас биирдии кыттааччыга оскуола салалтата олохтообут анал остуолга ууруллар бэлиэлэрэ, мэҥэ суруктар, бириистэр туттарылыннылар. Анал бириистэри Герой Егоров уулуссатыгар турар тэрилтэлэр: үөрэх управлениета (Тарская И.М.), нолуок сулууспата (Мылахов В.Д.), «Сыырдаах» ООО (Стрекаловскай В.В.), «Амсай» кафе (Заболоцкай С.Н.), Мүрү нэһилиэгэ (Аммосов В.И.), Байаҕантай нэһилиэгэ (Иванов И.Н.), Танда орто оскуолата (Егорова Н.М.), Танда музейа (Черноградская М.П.) туруордулар. Оскуола омук тылын учуутала В.Н.Бурцева ааҕыыларга кыттыбыт оҕолору түмэн «Т.О.К.» оонньууну сонуннук тэрийэн ыытта, оонньуу форматынан оҕолор геройу төһө билэллэрин өссө биирдэ тургутан көрдө. Оҕолор бары көхтөөхтүк кыттан оонньууттан астыммыттарын биллэрдилэр. Тэрээһини көрсө оскуола «Сыдьаай» хаһыатын анал нүөмэрэ тахсыбыта. Манна оскуола 7 «а» кылааһын үөрэнээччилэрэ учууталларын В.И. Аммосова, М.Д. Местникова салалтатынан геройга аналлаах суруйуулара түмүллэн бэчээттэммитэ. Геройга сүгүрүйүү, ытыктабыл бэлиэтигэр аналлаах күн сэргэхтик, өрө көтөҕүллүүлээхтик ааста. Тэрээһиҥҥэ өйөбүл буолбут бары тэрилтэлэргэ, биирдиилээн дьоҥҥо улууспут геройун аатыгар сүгүрүйүү, өйдөбүл күнүгэр кыттыыгыт иһин махталбытын биллэрэбит.

Е.Н.Сыроватская, Мүрү 1 №-дээх орто оскуолатын музейын үлэһитэ 29.03.2017 с.