Кыайыы күнүн аҕа саастаах көлүөнэ сүрэҕэр чугастык ылынар, долгуйа көрсөр. Билигин биһиги ортобутугар аҕыйах тыыл бэтэрээннэрэ, итинтэн өссө аҕыйах сэрии огдооболоро хаааллылар. Улуу Кыайыы 72 күнүн көрсө Г.В.Егоров аатынан Мүрү 1 №-дээх орто оскуолатын профкомун (председатель Пестрякова О.Е.) тэрийиитинэн оскуолаҕа үлэлээбит тыыл бэтэрээннэрин уонна үлэ бэтэрээннэрин түмэн үс массыынанан тарҕатан олордон, Мүрү нэһилиэгин өйдөбүл миэстэлэринэн сырытыннардылар. 1945 сыл бэс ыйын 20-21 күннэригэр Бороҕоҥҥо Хос Үрэххэ ыытыллыбыт Кыайыы ыһыаҕын кыттыылааҕа, Слепцовтар педагогическай династияларын баһылыга Гоголева Матрена Семеновна уонна тыыл, педагогическай үлэ бэтэрээнэ Долгунов Иван Алексеевич күндү ыалдьыт быһыытынан кыттыыны ыллылар. Бастаан Мүрү эбэ арҕаа баһыгар Хараҕа Төрдүгэр, оттон бөһүөлэккэ кэлэн мемориальнай комплекска сырыттыбыт, Кыайыы туһугар фроҥҥа эрдээхтик сэриилэспит биир дойдулаахтарбыт ааттарын ахтан-санаан аастыбыт. Салгыы оскуолабыт таһыгар Г.В.Егоров уонна И.П.Рыбкина памятниктарын тастарыгар хаартыскаҕа түстүбүт, Дьөгүөрэп туһунан ырыаны өрө көтөҕүллэн толордубут. Оскуола салалтатын методическай холбоһугун тэрийиитинэн иһирэх биэчэр ыытылынна. Кыайыыга аналлаах хоһоон ааҕыыта, 50-60-70 сыллардааҕы таҥастары көрдөрүү, үҥкүүлэри толоруу, “БиҺиги ССРС-тан” советскай кэмнээҕи мал-сал быыстапката, о.д.а. сэргэх күрэхтэһиилэр ыытылыннылар. 96-ыс сааһыгар үктэммит Матрена Семеновна тэҥинэн сылдьыһан сөхтөрдө, эдэр көлүөнэҕэ кэс тылын этэн тэрээһин суолтатын үрдэттэ.

Е.Н.Сыроватская, общ.корр.

2017 сыл ыам ыйын 10 күнэ.