“Мүрү боотурдара”

Кулун тутар 3 күнүгэр Мүрү 1-гы №-дээх орто оскуолата тэриллибитэ 145 сылын, Герой Г.В.Егоров аатын сүкпүтэ 70 сылын көрсө 8-11 кылаас уолаттарыгар “Мүрү боотурдара” улуустааҕы күрэс ыытылынна. Барыта 9 оскуолаттан, 12 уолан күөн көрүстүлэр. Күрэс үөрүүлээх арыллыытын оскуола директора С.С.Бурнашев ким дьоҕурдаах, бэлэмнээх бэйэтигэр эрэллээх ол кыайдын диэн тылынан арыйда. Уолаттар барыта 8 көрүҥҥэ күрэхтэстилэр. Ол курдук, бэйэлэрин билиһиннэрдилэр, Герой Г.В. Егоровка сыһыаннаах ыйытыыга эппиэттээтилэр, ыстаннылар (үс төгүл үс), мас тардыстылар, ыараханы көтөхтүлэр, тутум эргиттилэр, кыыс эккирэттилэр, бэйэлэрин күүстэрин-кыахтарын көрдөрдүлэр. Саамай тыҥааһыннаах киирсиинэн хомуур хапсаҕай буолла. Бу көрүҥҥэ кыттааччы бэйэтин эрэ кыаҕын буобакка, хамаандаҕа хайдах үлэлиирин көрдөрдө.

Бу сэттэ түһүмэх кэннэ иннин кимиэхэ да биэрбэккэ, Мындааба орто оскуолатын 10 кылаас үөрэнээччитэ Богдал Овчинников эрэллээхтик кыайыылаах үрдүк аатын ылан, “МР-155” саа докумуонун хаһаайынынан буолла. Иккис миэстэҕэ Суотту орто оскуолатын 11 кылааһын үөрэнээччитэ Миша Абрамов тахсан “Бор” массыынанан наҕараадаланна, үһүс бириистээх миэстэҕэ Мындааба орто оскуолатын 10 кылаас үөрэнээччитэ Пан Стручков тиксэн сыаналаах бирииһинэн наҕараадаланна.

Мүрү 1-гы №-дээх орто оскуолатын аатыттан барҕа махталбытын “Мүрү боотурдара” күрэс спонсордарыгар, Бороҕон сэлиэнньэтин урбаанньыттарыгар, педобщественноска тиэрдэбит. Кинилэр чөл олоҕу, спорду, эдэр ыччаттары өйүүллэрэ киһини үөрдэр, инникигэ кэскиллиир.