Оскуолабытыгар үрдүкү кылаас үөрэнээччилэригэр идэҕэ туһаайар үлэ тиһигин быспакка ыытыллар. Ол чэрчитинэн муус устар 5 күнүгэр 9-11 кылаас үөрэнээччилэрин кытта оскуола 1983 сыллааҕы выпускниктара “Анаабыр алмаастара” аһаҕас акционернай тэрилтэ генеральнай  директорын солбуйааччы Черноградскай Владимир Николаевич уонна “Саха Республикатын быыһыыр сулууспата” ГКУ начальнигын бастакы солбуйааччы Тарскай Василий Васильевич көрсүстүлэр. Тэрээһини киирии тылынан директоры иитэр үлэҕэ солбуйааччы Стрекаловская Туйаара Платоновна аста.

     Ыалдьыттар үлэлэрин-хамнастарын билиһиннэрдилэр,  баһылаабыт идэлэрин ымпыгар-чымпыгар тиийэ кэпсээтилэр, үөрэнээччилэр ыйытыыларыгар эппиэттээтилэр. Саха ыччата промышленноска сыстан үлэлэһиэн, республика сиртэн хостонор баайын-дуолун атын омуктары кытта тэҥҥэ сылдьан быһаарсыан наадатын эттилэр. Василий Васильевич үлэтэ эт-хаан өттүнэн сайдыылаах, чэгиэн доруобуйалаах буолууну эрэйэрин тоһоҕолоон бэлиэтээтэ. Үөрэнээччилэр, ордук биһиги инники эрэллэрбит уолаттар, ханнык да ыарахатттартан толлубакка, промышленность араас хайысхатынан уонна ыксаллаах быһыы-майгы үлэһитин курдук саҥа идэлэри баһылаан, норуокка туһалаах, үөрэммит оскуолаларын, төрөөбүт улуустарын ааттатар дьон буолан тахсалларыгар баҕа санааларын тиэртилэр.

   Викторина ыыттылар, онно оҕолор көхтөөхтук кыттан сэдэх кинигэ бэлэх ылан үөрдүлэр-көттүлэр. 9б кылаас үөрэнээччитэ Протодьяконов Артемҥа Владимир Николаевич, техническэй үөрэҕи баһылаар диэн алҕаан туран, “Анаабыр алмаастара” АК үлэтин-хамнаһын сиһилии көрдөрөр элбэх өҥнөөх хаартыскалардаах дьоһуннаах кинигэни бэлэхтээтэ.

     Көрсүһүүнү 7а кылаас үөрэнээччилэрэ уонна музыка уруогун учуутала Никифоров В.В. ырыанан киэргэттилэр.

    Түмүккэ оскуолабыт директора Баханов П.П. күндү ыалдьыттарга махтанан туран администрация, педколлектив,  үөрэнээччилэр ааттарыттан махтал суругу уонна оскуола 1983 сыллаах выпускниктарын туһунан буклеты дохсун ытыс тыаһынан туттарда.  

    7-8 кылаастарга 3 эдэр специалист ыксаллаах быһыыга-майгыга хайдах буолуохха сөбүн көрдөрөр практическай дьарыгы ыыттылар. Сылдьыбыт оҕолор бары астыннылар.

   Маннык үрдүк таһымнаах көрсүһүүлэр өссө да ыытылла турдуннар.