Биһиги улууспутугар Ушницкай Михаил Ильиһи билбэт киһи суоҕа буолуо. Кини идэтинэн физика, математика учуутала, өр кэмҥэ оскуолаҕа үлэлээбитэ, билигин Республикатааҕы олимпийскай резервэ оҕо спортивнай оскуолатыгар саахымакка старшай тренерынан үлэлиир. 1996 сыллаахха Мүрү 1 №-дээх орто оскуолатыгар учууталынан үлэлии сылдьан, саахымат куруһуогун арыйан үлэлэппитэ. Бастакы иитиллээччитинэн Парников Саша буолбута, онтон оҕолор бэйэ - бэйэлэриттэн истиһэн, саахымат куруһуогун сөбүлээн, дьарыктанан барбыттара. Ушницкай М.И. бэйэтэ оҕолору саахымакка дьарыктыыр баҕата баһыйан, 2003 сылтан саахымат тренерынан общественнай төрүккэ олоҕуран үлэтин саҕалаабыта. Бастаан утаа үлэлиир сирдэрэ суоҕа, оскуолаларынан, үөрэх управлениетынан сылдьан оҕолору дьарыктыыра. Онтон улуус иһинэн оҕо спртивнай оскуолата арыллан, Н.Н.Тарскай аатынан спортивнай комплекска киирбиттэрэ, онно туспа хос, саҥа интвентарь булуммуттара, үлэлииргэ усулуобуйаламмыттара. Таһаарыылаахтык үлэлии сырыттаҕына 2013 сылга Республикатааҕы оҕо спорт оскуолатыгар саахымат старшай тренерынан ыҥырбыттара, билиҥҥи олох хаамыытынан саҥа технологиялары туттан оҕолорго саахымат абылаҥнарын, кистэлэҥнэрин үөрэтэ сылдьар. Ушницкай М.И. - СӨ үтүөлээх тренерэ, бэйэтэ 1 разрядтаах, саахымат старшай тренерэ. Сыратын биэрэн, иитэн-такайан таһаарбыт оҕолоро: Васильев Вася – ФИДЕ маастара, республика улахан дьоҥҥо 2 төгүллээх чемпиона, Уһук Илиҥҥэ улахан дьоҥҥо 2 миэстэ. Саахымат инники кэскиллэрэ Баишева Нюргуяна, Мүрү 1 № -дээх орто оскуолатын 6 кылаас үөрэнээччитэ, Уһук Илин 2 төгүллээх чемпиона , Россияҕа 6 миэстэ, топ – шахматист. Бу күннэргэ Баишева Нюргуяна Уһук Илиҥҥэ улахан дьоҥҥо күрэхтэһэ сылдьар. Избекова Дуня Мүрү 2 № -дээх орто оскуолатын үөрэнээччитэ, Уһук Илин 2 төгүллээх чемпиона, түргэн саахымакка Россияҕа 4 миэстэлээх. Баишева Нюргуяна уонна Избекова Дуня муус устар ыйга Сочи куоракка ыытыллар Россия чемпионатыгар бараары бэлэмнэнэллэр. Рожина Саяна Куо Мүрү 1 № -дээх орто оскуолатын 4 кылаас үөрэнээччитэ, Уһук Илин үһүс призера, республика чемпиона. Кулун тутар 18 күнүгэр Мүрү 1 № -дээх орто оскуолатыгар ФИДЕ маастара, Саха Өрөспүүбүлүкэтин старшай тренера Роман Владимирович Ганжуров биир бириэмэлээх саахымакка сеансы ыытта, Ущницкай М. И. судьуйалаата. Барыта 25 киһи кытынна, 18 оҕо уонна 7 улахан киһи. Оҕолортон саамай үчүгэйдик Рожина Сайаана Куо оонньоото, оонньуу былаһын тухары тэҥ позицияҕа олордо, бүтэһиккэ алҕаһы оҥорон, кыл мүччү хоттордо (тренерэ Ушницкай М.И. ). Канаева Алина, Мүрү 1 №-дээх орто оскуолатын 6 кылааһын үөрэнээччитэ, оонньуу ортотугар хардарыта атаакалаһан сытыы балаһыанньаны үөскэппитэ, ол гынан баран дубук туттан, инициативатын былдьатан хотторбута, хорсуннук оонньообута буоллар кыайыан да сөбө. Онтон атын оҕолор маастарга баһыйтаран хоттордулар. Улахан дьонтон улуус чемпиона Аммосов Дмитрий Викторович күүстээх утарсыыны оҥорон, дьоһун тэҥнэһиини эрэллээхтик ылла. Саахымат күрэҕэр саахыматы таптыыр, сүгүрүйэр дьоннор кэлэн кытыннылар, ол курдук, ветеран саахымаччыт Гоголев И.С., Павлов Д.Д., Кэптэни сэлиэнньэтиттэн Новгородовтар дьиэ кэргэн. ФИДЕ маастарын Р.В.Ганжуровы кытта саахымат дуоскатыгар киирсии туһааннаах саахымаччыкка бастыҥ оскуоланан буолла, үтүө эрэ өйдөбүлү хаалларда.