Мүрү 1 N-дээх орто оскуолатын “Мүрү” байыаннай-патриотическай кулууба (салайааччы Н.С.Андросов) Саха сирин көмүскээн Волгоград куоракка Бүтүн Россиятааҕы “Кыайыы” байыаннай-спортивнай оонньуутун финальнай этапыгар 2016 сыл атырдьах ыйыгар 8 уол, 2 кыыс ситиһиилээхтик кыттан кэлбиттэрэ. Ол ситиһиилэрин түмүгүнэн кинилэргэ анаан Россияттан Бүтүн Россиятааҕы “Артек” лааҕырга сынньанарга биир путевка ананан кэлбитэ. Ол путевканан 8 “а” кылааһын үөрэнээччитэ, спортсмена, кулууп чилиэнэ Бережнев Ганя тохсунньу-олунньу ыйдарга баран сынньанан кэллэ. Мин кинини көрсөн аҕыйах боппуруоска эппиэттииригэр көрдөстүм:

- Ганя, дорообо. Бастатан туран, “Артекка” сынньанан кэлбиккинэн эҕэрдэлиибин. Дьэ, кэпсээ эрэ, сураҕа Саха сириттэн соҕотоҕун “Артекка” тиийбит үһүгүн дии.

- Дорообо. Эҕэрдэҥ иһин баһыыба. Кырдьык даҕаны, бэйэм да соһуйбутум, эмискэ учууталым Николай Семенович “Артекка” бар диэбитигэр, ийэлээх аҕабын кытта сүбэлэһэн баран, барарга быһаарыммытым. Дьонум, аймахтарым, эдьиийдэрим, убайдарым мин барарбын истэн түргэн үлүгэрдик харчы хомуйан, билет булан, докумуон хомуйсан, икки күн иһинэн айаҥҥа туруммутум. Түгэнинэн туһанан, учууталбар Николай Семеновичка, оскуолабыт завуһугар Туйаара Платоновнаҕа, ийэбэр, аҕабар, дьоммор улахан махталбын, баһыыбабын тиэрдэбин.

- “Артек” туһунан туох өйдөбүллээх кэллиҥ.

- “Артекка” тиийэн миигин 12 “Морской” диэн ааттаах отрядыгар сыһыардылар. Түспүт хоспор сэттэ бэйэбин кытта саастыы уолаттары кытта олордум. Башкир, татар, дагестанец, калмык, нууччалар уонна мин буолан наһаа эйэлээхтик, бэһиэлэйдик үс нэдиэлэ устата биллибэккэ ааспытыгар, бүтэһигэр биир-биир барыларын атааран бүтэһигэр соҕотоҕун хоспор хаалан бириэмэм бытаанын онно билбитим. Лааҕырбыт хас биир чааһа барыта аттарыллан оҥоһуллубут буолан, бириэмэни билбэккэ да хаалабыт. Конкурс бөҕөтүн ыыттылар. Онно биһиги отрядбыт үксүн бастакы миэстэни ыламмыт үөрүүбүт муҥура суох этэ. Ол курдук, “Народы Земли” үҥкүү конкурсугар Гран-при, “Большие тайны маленького острова” диэн познавательнай оонньууга, “Берегите Землю, берегите!!!” агитбригада конкурсугар, “Карнавал” костюм массовкатыгар бастакы, “Мы тоже являемся частью Вселенной” музыкальнай, “Веселая Спортландия” иккис, “Эрудит-марафон” интеллектуальнай оонньууга үһүс миэстэлэри ылбыппыт. Манна воспитателлэрбит Карина, Полина, Александр сүрдээх көхтөөхтүк кытыннаран элбэҕи билэн-көрөн кэллим. Итини таһынан оскуола предметтэригэр уруоктар ыытыллыбыттара, футболга күн ахсын оонньоон, бассейнҥа сөтүөлээн кэллим. “Артек” турар сирэ хайалардаах буолан дабайыы, түһүү элбэх эбит. Остолобуойугар ас арааһын тардан кэбиһэллэр, онтон бэйэҥ сөбүлүүр астаргын талан ылан аһыыгын. Онтукайын ордук сөбүлээтим. Севастополь куоракка сырытыннардылар. Онно автобуһунан Севастополь куорат Аҕа дойду сэриитигэр сэриилэспит панораматын көрдөрдүлэр. Киэҥ сиринэн тайаан оҥорбуттара сөҕүмэр этэ. Дьиҥнээх сэрии буола турарын курдук көрдөрбүттэр. Ол кэнниттэн куорат таһыгар былыргы үйэтээҕи тутуулар эмиэ бэйэтэ туһунан аһаҕас халлаан анныгар музей буолан турара интэриэһинэй эбит. Итини таһынан “Артекпут” иһигэр космонавтикаҕа, айылҕаҕа аналлаах музейдарга сырытыннардылар.

- Кырдьык да, киһи көрөрө элбэх эбит дии. Ганя, түмүккэр оҕолорго тугу баҕарыаҥ этэй.

- Соһуччу Волгоград, Москва, Санкт-Петербург, Симферополь, Севастополь уонна “Артек” курдук сирдэргэ сылдьыы миэхэ хаһан да умнуллубат түгэн буолара буолуо. Оҕолорго баҕарарым диэн элбэх кружоктарга сылдьан, бэйэ таһымын үрдэтэргэ кыһаллын. Туохтан да толлубат, харса суох инники диэки баран иһиҥ.

- Ганя, интэриэһинэй кэпсээниҥ иһин улахан махтал.

Кэпсэттэ

Айта ВАСИЛЬЕВА,

Мүрү 1 N-дээх орто оскуолатын 8 “а” кылааһын үөрэнээччитэ.