Биир үтүө күн биһиги оскуолабыт олоҕор улахан сэргэхсийиини таһаарбыт сонун үс этээһи тилийэ көттө: кый ыраах Соҕуруу Кореяттан экстремал айанньыттар кэлбиттэр.

  Уруок бүтэн, чуораан тыаһаабытыгар көрүдүөргэ хаһааҥҥытааҕар да элбэх оҕо мустан сонуннарын үллэстэн аймаластылар. Ким эрэ кинилэри остолобуойга көрбүтүн, ким эрэ аһары улахан да улахан рюкзак сүкпүттэрин, нууччалыы-английскайдыы саҥаралларын сонун оҥостон кэпсэтэллэр.

    Биһиги кылаастан Старостин Ганя английскайдыы быһаарсан кинилэри кылааспытыгар ыҥырда. Ону истэн 9б,10б кылаастартан интэриэһиргээбит оҕолор, уруоктарыттан көҥүллэтэн, биһиги кылааспытыгар толору муһуннубут. Икки өттүттэн сэргэх, истиҥ кэпсэтии таҕыста. Кэпсэтии үксүн английскай тылынан барда. Сорох оҕолор кэриэйдии быстах-остох билэр тылларынан кэпсэппиттэригэр ыалдьыттарбыт ис сүрэхтэриттэн үөрдүлэр.

  Кинилэр төрдүө буолан Сеул уонна Пусан куораттартан Саха сирин тымныы кыһынын, сахалыы  тылы-өһү, саха норуотун историятын интэриэһиргээн кэлбиттэр. Бэйэлэрин тылларынан ыллаатылар, биһиги онуоха хардаран Уус-Алдан гимнин ыллаатыбыт. Видеоҕа уһуллулар. Көрсүһүү түмүгэр, аныгы дьон быһыытынан  селфилиэххэ диэн, хаартыскаҕа түстүбүт.

   Су Мин, Чан Пиль, Хаын, Бахха Эхун биһиэхэ өргө диэри умнуллубат истиҥ иһирэх көрсүһүүнү бэлэхтээтилэр,омук тылын билэр наадалааҕын күүскэ өйдөттүлэр.

Рожина Уйгулаана

Мүрү 1 №–дээх орто оскуолатын 9а кылааһын

 үөрэнээччитэ, ”Чаҕыл” эдкорпост чилиэнэ, Уус-Алдан