Бу күннэргэ өрөспүүбүлүкэ үрдүнэн орто оскуолаларга “Тиһэх чуораан” чугдаарар. Ыам ыйын 23 күнүгэр Г.В. Егоров аатынан Мүрү 1 №-дээх орто оскуолатыгар “Тиһэх чуораан” күнүн бэлиэтээтибит.

Быйыл оскуолабыт үбүлүөйдээх сылыгар 30 выпускник бүтэрэр, кылаас салайааччылара Л.А. Исакова, И.И. Никонов. Бу күнү выпускниктар үөрүүлээх кылаас чааһынан саҕалаабыттара. Линейканы оскуола директора Бурнашев С.С. истиҥ эҕэрдэтинэн аста. Ыҥырыллыбыт ыалдьыттар: улуус баһылыга Федотов А.В., улуус үөрэҕин управлениетын аатыттан идэлээх сойуус бэрэссэдээтэлэ Попова А.А. выпускниктарга эҕэрдэ тылларын, истиҥ баҕа санааларын, эксээмэннэрин ситиһиилээхтик туттаралларыгар баҕардылар.

Салгыы үөрэх бастыҥнарыгар анал стипендиялары туттарыы чааһа ыытылынна. Ил Түмэн спикера А. Н. Жирков анал стиепендиятын кыһыл көмүс мэтээлгэ кандидат, үөрэх туйгуна, Санкт – Петербурдааҕы Павлов аатынан мединститукка рекомендациялаах Настя Алексееваҕа улуус баһылыга А.В. Федотов туттарда.

Улуус дьаһалтатын баһылыгын А.В. Федотов анал стипендиятын үөрэх бастыҥа, Хабаровскайдааҕы мединститукка рекомендациялаах Лидия Пеговаҕа,

И.П. Рыбкина аатынан анал стипендиятынан улуустааҕы интегрированнай олимпиада нуучча тылыгар призера Павел Голиковка туттардылар. Оскуола директора С.С. Бурнашев аатыттан - Евдокия Бурнашева, оскуола 1973 сыллааҕы выпускниктарын анал стипендиятынан Анатолий Лугинов, 1997 сыллааҕы выпускниктар - Иннокентий Троев, үөрэх управлениетын иитэр үлэҕэ отделын начальнигын П.П. Баханов аатыттан - Иннокентий Олесов, оскуола үөрэх - иитии чааһыгар завучтарын В.Л. Васильева – Марфа Бурнашева, Т.П. Стрекаловская - Айаал Никифоров наҕараадаланнылар. Ону тэҥэ оскуола методическай холбоһуктара олимпиадаларга ситиһиилээх үөрэнээччилэригэр анал стипендиялары анаатылар. «Спектр» - Маша Борисова 9 кыл., «Лингва» - Елена Лыткина 11 кыл., «Эдельвейс» - Сааскылаана Борисова 11 кыл., «Росток» - Мария Васильева 11 кыл. туттарыннылар.

"Тиһэх чуораан” күнүн оскуола выпускниктара учууталларга, төрөппүттэргэ бэйэлэрэ туруорбут концертарын көрдөрөн түмүктээтилэр. Выпускниктарбытыгар ситии - хотуу аттестаатын ылан, талбыт идэлэригэр киирэн, олох киэҥ аартыгар эрэллээхтик үктэнэллэригэр баҕарабыт.